କଲେଜ ହଷ୍ଟେଲରୁ ଇଞ୍ଜିନିୟରିଂ ଛାତ୍ରୀଙ୍କ ଝୁଲନ୍ତା ମୃତଦେହ ଉଦ୍ଧାର

ବାଲେଶ୍ୱର: ବାଲେଶ୍ୱର ଜିଲ୍ଲାର ଖନ୍ତପଡ଼ା ଥାନା ଅନ୍ତର୍ଗତ ସେରଗଡ଼ ଅଞ୍ଚଳର ଏକ ଘରୋଇ କଲେଜର ହଷ୍ଟେଲ ରୁମରେ ଜଣେ ଇଞ୍ଜିନିୟରିଂ ଛାତ୍ରୀଙ୍କ ମୃତଦେହ ଉଦ୍ଧାର କରାଯାଇଛି। କମ୍ପ୍ୟୁଟର ସାଇନ୍ସର ଦ୍ୱିତୀୟ ବର୍ଷର ଉକ୍ତ ଛାତ୍ରୀ ଜଣକ ନୀଳଗିରି ପଞ୍ଚଲିଙ୍ଗେଶ୍ୱର ଅଞ୍ଚଳର ବୋଲି ଜଣାପଡ଼ିଛଛି | ସୂଚନା ଅନୁଯାୟୀ, ସେ କଲେଜ ହଷ୍ଟେଲରେ ରହୁଥିଲେ।

ସୋମବାର ବିଳମ୍ବିତ ରାତିରେ ଅନ୍ୟ ଛାତ୍ରୀମାନେ ତାଙ୍କ କୋଠରୀର ସିଲିଂ ଫ୍ୟାନରେ ଝୁଲୁଥିବା ମୃତଦେହ ଦେଖି ତୁରନ୍ତ କଲେଜ କର୍ତ୍ତୃପକ୍ଷଙ୍କୁ ଖବର ଦେଇଥିଲେ। ପରେ ଏନେଇ ପୋଲିସକୁ ଅବଗତ କରାଯାଇଥିଲା। ଏପରିକି ସୂଚନା ପାଇ ଛାତ୍ରୀଙ୍କ ପରିବାର ସଦସ୍ୟ ହଷ୍ଟେଲରେ ପହଞ୍ଚିଥିଲେ। ଘଟଣାଟି ଆତ୍ମହତ୍ୟା ମାମଲା ବୋଲି ଜଣାପଡୁଥିଲେ ମଧ୍ୟ ମୃତ୍ୟୁର ସଠିକ୍ କାରଣ ଅସ୍ପଷ୍ଟ ରହିଛି। ଖନ୍ତାପଡ଼ା ପୋଲିସର ଏକ ଦଳ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ମୃତଦେହ ପୋଷ୍ଟମର୍ଟମ ପାଇଁ ପଠାଯିବା ସହ ତଦନ୍ତର ଅଂଶ ସ୍ୱରୂପ ହଷ୍ଟେଲ ଅନ୍ତେବାସୀ ଏବଂ ଅଧିକାରୀଙ୍କ ବୟାନ ରେକର୍ଡ କରାଯାଉଛି।