ଗୌହାଟିରେ ହୋଟେଲରେ ଗୁଳିକାଣ୍ଡ: ୫ ମୃତ, ଜଣେ ଆହତ
ଆସାମ: ଆସାମର ରାଜଧାନୀ ଗୌହାଟିର ହୋଟେଲ ବିଲାସରେ ଗୁଳିକାଣ୍ଡ ଘଟିଛି । ଏହି ଆଖିବୁଜା ଗୁଳିକାଣ୍ଡରେ ୫ ଜଣଙ୍କର ମୃତ୍ୟୁ ହୋଇଥିବାବେଳେ ଜଣେ ଆହତ ହୋଇଛନ୍ତି । ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଆତଙ୍କ ସୃଷ୍ଟି କରିଛି । ଗୌରବ ଗୋଗୋଇ ଏହି ଘଟଣାରେ ଦୁଃଖ ପ୍ରକାଶ କରିଛନ୍ତି । ପୋଲିସ ଅଭିଯୁକ୍ତକୁ ଗିରଫ କରିଥିବା ଘୋଷଣା କରିଛି।
ଏହାରି ମଧ୍ୟରେ ଆସାମ କଂଗ୍ରେସ ସଭାପତି ଗୌରବ ଗୋଗୋଇ ଏହି ଘଟଣାରେ ଦୁଃଖ ପ୍ରକାଶ କରିଛନ୍ତି ଏବଂ ଘଟଣାର ପୁଙ୍ଖାନୁପୁଙ୍ଖ ତଦନ୍ତ ଏବଂ ଅଭିଯୁକ୍ତଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି। ଗୌରବ ଗୋଗୋଇ କହିଛନ୍ତି ଯେ, “ଗୌହାଟୀର ଉଲାବାରୀରେ ଥିବା ହୋଟେଲ ବିଳାସ ଇନ୍ରେ ଗୁଳିକାଣ୍ଡର ଦୁଃଖଦ ଘଟଣାରେ ମୁଁ ଗଭୀର ଭାବରେ ମର୍ମାହତ । ଯେଉଁଥିରେ ପାଞ୍ଚ ଜଣଙ୍କ ଜୀବନ ଯାଇଥିବା ଜଣାପଡ଼ିଛି । ପୀଡିତଙ୍କ ପରିବାର ପ୍ରତି ମୋର ଗଭୀର ସମବେଦନା ।” ସେ ଆହୁରି ମଧ୍ୟ କହିଛନ୍ତି ଯେ, “ଏହି ଘଟଣା ଗୌହାଟୀର ଜନସାଧାରଣଙ୍କ ସୁରକ୍ଷା ଏବଂ ଆଇନ ଶୃଙ୍ଖଳା ପରିସ୍ଥିତି ପ୍ରତି ଗମ୍ଭୀର ଚିନ୍ତା ସୃଷ୍ଟି କରୁଛି । ମୁଖ୍ୟମନ୍ତ୍ରୀ ଏବଂ ଗୃହମନ୍ତ୍ରୀ ଭାବରେ, ହିମନ୍ତ ବିଶ୍ୱ ଶର୍ମାଙ୍କୁ ଦାୟିତ୍ୱ ନେବାକୁ ପଡିବ ଏବଂ ବର୍ଦ୍ଧିତ ଅପରାଧ ହାର ପ୍ରତି ଅଧିକ ଧ୍ୟାନ ଦେବାକୁ ପଡିବ । ମୁଁ କର୍ତ୍ତୃପକ୍ଷଙ୍କୁ ଏହାର ପୁଙ୍ଖାନୁପୁଙ୍ଖ ତଦନ୍ତ କରିବାକୁ, ଦୋଷୀମାନଙ୍କୁ ନ୍ୟାୟ ଦେବାକୁ ଏବଂ ଏପରି ଦୁଃଖଦ ଘଟଣା ପୁନରାବୃତ୍ତି ନହେବା ପାଇଁ ଦୃଢ଼ ପଦକ୍ଷେପ ନେବାକୁ ଅନୁରୋଧ କରୁଛି ।”
ଅନ୍ୟପଟେ ଗୌହାଟି ସିପି ପାର୍ଥ ସାରଥୀ ମହାନ୍ତ କହିଛନ୍ତି ଯେ, “ଆଜି ରାତି ପ୍ରାୟ ୯ଟା ସମୟରେ ଗୌହାଟିର ବୋରା ସର୍ଭିସ ଅଞ୍ଚଳରେ ଅବସ୍ଥିତ ହୋଟେଲ ବିଲାସ ଇନ୍ରେ ଗୁଳିକାଣ୍ଡର ଏକ ଦୁର୍ଭାଗ୍ୟଜନକ ଘଟଣା ଘଟିଛି। ଗୁଳିକାଣ୍ଡରେ ୬ ଜଣ ଆହତ ହୋଇଥିଲେ, ଯେଉଁଥିରୁ ୫ ଜଣଙ୍କର ମୃତ୍ୟୁ ହୋଇଛି । ଜଣେ ବ୍ୟକ୍ତି ଚିକିତ୍ସାଧୀନ ଅଛନ୍ତି ଏବଂ ଅଭିଯୁକ୍ତକୁ ଗିରଫ କରାଯାଇଛି । ଘଟଣାରେ ବ୍ୟବହୃତ ଅସ୍ତ୍ର ମଧ୍ୟ ଜବତ କରାଯାଇଛି । ଘଟଣାର କାରଣ ଜାଣିବାକୁ ତଦନ୍ତ ଜାରି ରହିଛି । ହୋଟେଲ ବିଲାସ ଇନ୍ର ଲିଜ୍ ଚୁକ୍ତିନାମା ସହିତ ଜଡିତ ସମ୍ପତ୍ତି ବିବାଦର ପରିଣାମ ସ୍ୱରୂପ ଏହି ଘଟଣା ଘଟିଥିବା ପୋଲିସ ପ୍ରାଥମିକ ତଦନ୍ତରୁ ସନ୍ଦେହ କରୁଛି । ଘଟଣାର ଗୋଟିଏ ଘଣ୍ଟା ମଧ୍ୟରେ ଅଭିଯୁକ୍ତକୁ ଗିରଫ କରାଯାଇଥିଲା । ମାମଲାକୁ ତାର୍କିକ ନିଷ୍କର୍ଷରେ ପହଞ୍ଚାଇବା ପାଇଁ ବୈଜ୍ଞାନିକ ଏବଂ ପୁଙ୍ଖାନୁପୁଙ୍ଖ ତଦନ୍ତ କରାଯାଉଛି ।”