ସ୍ତ୍ରୀ ସହ ୩ ଝିଅଙ୍କୁ ପଥରରେ ଛେଚି ହତ୍ୟା

ଜୟପୁର : ଜୟପୁରରେ ଜଘନ୍ୟ ହତ୍ୟାକାଣ୍ଡ ।  ସ୍ତ୍ରୀ ଓ ୩ ଝିଅଙ୍କୁ ହତ୍ୟା କଲା ସ୍ୱାମୀ ।  ରାଜସ୍ଥାନର ରାଜଧାନୀ ଜୟପୁରରୁ ଏକ ଅତ୍ୟନ୍ତ ସ୍ତବ୍ଧ କରିଦେବା ଭଳି ଘଟଣା ସାମ୍ନାକୁ ଆସିଛି। ଘରେ ସମସ୍ତେ ଶୋଇଥିବା ସମୟରେ ନିଜ ସ୍ତ୍ରୀ ଏବଂ ତିନି ନାବାଳିକା ଝିଅଙ୍କୁ ବଡ଼ ସିମେଣ୍ଟ ବ୍ଲକରେ ମୁଣ୍ଡକୁ ଛେଚି ଅତି ନିଷ୍ଠୁର ଭାବେ ହତ୍ୟା କରିଛି ଅଭିଯୁକ୍ତ। ଏହି ପିଶାଚ କାଣ୍ଡ ଭିଆଇବା ପରେ ଅଭିଯୁକ୍ତ ଜଣକ ନିଜ ବୃଦ୍ଧ ବାପାଙ୍କୁ ଚା’ କରି ପିଆଇଥିଲା ଏବଂ ତା’ପରେ ଘଟଣାସ୍ଥଳରୁ ଫେରାର ହୋଇଯାଇଥିଲା ।

ପରେ ପରିବାର ଲୋକେ ମୃତଦେହଗୁଡ଼ିକୁ ଦେଖି ପୋଲିସକୁ ଖବର ଦେଇଥିଲେ। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଶବଗୁଡ଼ିକୁ ଜବତ କରି ପୋଷ୍ଟମର୍ଟମ ପାଇଁ ପଠାଇଛି। ତିନି ଝିଅଙ୍କ ମୃତଦେହ ତଳ ମହଲାରେ ମିଳିଥିବା ବେଳେ ସ୍ତ୍ରୀଙ୍କ ମୃତଦେହ ଉପର ମହଲାରୁ ମିଳିଛି। ଅଭିଯୁକ୍ତକୁ ଧରିବା ପାଇଁ ପୋଲିସ ଟିମ୍ ଗଠନ କରି ଛାନଭିନ୍ ଜାରି ରଖିଛି। ହତ୍ୟାକାଣ୍ଡର ସଠିକ୍ କାରଣ ଏପର୍ଯ୍ୟନ୍ତ ଅସ୍ପଷ୍ଟ ରହିଛି, ପାରିବାରିକ କଳହରୁ ଏହି କାଣ୍ଡ ଘଟିଥାଇପାରେ ବୋଲି ସନ୍ଦେହ କରାଯାଉଛି।