‘ଏସ୍ସିଓ ସିଭିଲାଇଜେସନାଲ୍ ଡାଏଲଗ୍ ଫୋରମ୍’ ପାଇଁ ପାକିସ୍ତାନ ସମେତ ୧୦ଟି SCO ସଦସ୍ୟ ଦେଶକୁ ଭାରତର ନିମନ୍ତ୍ରଣ
ନୂଆଦିଲ୍ଲୀ: ଭାରତ ଆସନ୍ତା ନଭେମ୍ବର ୨୦ ରୁ ୨୨ ପର୍ଯ୍ୟନ୍ତ ନୂଆଦିଲ୍ଲୀଠାରେ ଆୟୋଜିତ ହେବାକୁ ଥିବା ପ୍ରଥମ ଶାଂଘାଇ ସହଯୋଗ ସଂଗଠନ (SCO) ‘ସାଂସ୍କୃତିକ ସଂବାଦ ମଞ୍ଚ’ ପାଇଁ ପାକିସ୍ତାନ ସମେତ ସମସ୍ତ ୧୦ଟି ସଦସ୍ୟ ରାଷ୍ଟ୍ରକୁ ନିମନ୍ତ୍ରଣ କରିଛି। ସାମରିକ ‘ଅପରେସନ୍ ସିନ୍ଦୂର’ ପରଠାରୁ ଦୁଇ ଦେଶ ମଧ୍ୟରେ ଜାରି ରହିଥିବା ଉତ୍ତେଜନାପୂର୍ଣ୍ଣ ସମ୍ପର୍କ ମଧ୍ୟରେ ଏହା ଏକ ଗୁରୁତ୍ୱପୂର୍ଣ୍ଣ କୂଟନୈତିକ ସଂକେତ ଭାବେ ଦେଖାଯାଉଛି।
ସୂଚନା ଅନୁଯାୟୀ, ଭାରତର ସଂସ୍କୃତି ମନ୍ତ୍ରଣାଳୟ ଏବଂ ବୈଦେଶିକ ବ୍ୟାପାର ମନ୍ତ୍ରଣାଳୟର ମିଳିତ ସହଯୋଗରେ ଏହି କାର୍ଯ୍ୟକ୍ରମ ଆୟୋଜିତ ହେଉଛି। ଏହି ବୈଠକ ପାଇଁ ପାକିସ୍ତାନର ଜାତୀୟ ଐତିହ୍ୟ ଓ ସଂସ୍କୃତି ମନ୍ତ୍ରୀଙ୍କୁ ଆନୁଷ୍ଠାନିକ ଭାବେ ଆମନ୍ତ୍ରଣ କରାଯାଇଛି। ଯଦି ସେ ଏହି ସମ୍ମିଳନୀରେ ଯୋଗଦିଅନ୍ତି, ତେବେ ୨୦୨୩ ମସିହାରେ ବିଲାୱାଲ ଭୁଟ୍ଟୋଙ୍କ ଗୋଆ ଗସ୍ତ ପରେ ଏହା କୌଣସି ପାକିସ୍ତାନୀ ମନ୍ତ୍ରୀଙ୍କ ପ୍ରଥମ ଭାରତ ଗସ୍ତ ହେବ।
ଏହି ବହୁପାକ୍ଷିକ ମଞ୍ଚର ମୁଖ୍ୟ ଉଦ୍ଦେଶ୍ୟ ହେଉଛି SCO ସଦସ୍ୟ ରାଷ୍ଟ୍ରଗୁଡ଼ିକ ମଧ୍ୟରେ ପ୍ରାଚୀନ ସଭ୍ୟତା, କଳା, ସାହିତ୍ୟ, ସଂସ୍କୃତି ଏବଂ ଐତିହାସିକ ସମ୍ପର୍କକୁ ଅଧିକ ସୁଦୃଢ଼ କରିବା। ୨୦୨୫ ସମିଟ୍ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଇଥିବା ପ୍ରସ୍ତାବ ଆଧାରରେ ଏହି ଫୋରମ୍ ଆରମ୍ଭ କରାଯାଇଛି।
ତେବେ କୂଟନୈତିକ ସୂତ୍ରରୁ ସ୍ପଷ୍ଟ କରାଯାଇଛି ଯେ ଏହି ସମ୍ମିଳନୀ ଏକ ବହୁପାକ୍ଷିକ ସଂଗଠନର କାର୍ଯ୍ୟକ୍ରମ ହୋଇଥିବାରୁ ଏହା ସହିତ ପାକିସ୍ତାନ ସହ ଭାରତର ଦ୍ୱିପାକ୍ଷିକ ସମ୍ପର୍କର କୌଣସି ସିଧାସଳଖ ଯୋଗସୂତ୍ର ନାହିଁ। ଆସନ୍ତା ୨୦୨୬-୨୭ ବର୍ଷ ପାଇଁ ପାକିସ୍ତାନ SCOର ଅଧ୍ୟକ୍ଷତା ଗ୍ରହଣ କରିଥିବା ବେଳେ ଏହି ଆଞ୍ଚଳିକ ସହଯୋଗକୁ ଆଗକୁ ନେବାକୁ ଭାରତ ଏହି ପଦକ୍ଷେପ ନେଇଛି। ଭାରତ, ପାକିସ୍ତାନ, ଚୀନ୍, ରୁଷ, ଇରାନ, କାଜାଖସ୍ତାନ, କିର୍ଗିଜସ୍ତାନ, ତାଜିକିସ୍ତାନ, ଉଜବେକିସ୍ତାନ ଓ ବେଲାରୁଷ ସମେତ ସମସ୍ତ ୧୦ଟି ଦେଶ ଏହି କାର୍ଯ୍ୟକ୍ରମରେ ଭାଗ ନେବା ପାଇଁ ନିମନ୍ତ୍ରିତ ହୋଇଛନ୍ତି।