ଭେନେଜୁଏଲାର ୬୫ ବିଲିୟନ ବ୍ୟାରେଲ ତୈଳ ଭଣ୍ଡାରକୁ ନିୟନ୍ତ୍ରଣ କରିବ ଆମେରିକା: ଟ୍ରମ୍ପ
ନୂଆଦିଲ୍ଲୀ: ଭେନେଜୁଏଲାକୁ ନେଇ ଆମେରିକାର ବଡ଼ ପଦକ୍ଷେପ। ଭେନେଜୁଏଲାର ପ୍ରାୟ ୬୫ ବିଲିୟନ ବ୍ୟାରେଲ ଅଶୋଧିତ ତୈଳ ଭଣ୍ଡାର ଉପରେ ଆମେରିକା ନିୟନ୍ତ୍ରଣ ନେବ ବୋଲି ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଘୋଷଣା କରିଛନ୍ତି। ଏହାକୁ ସେ “ବିଶ୍ୱ ଇତିହାସର ସବୁଠାରୁ ବଡ଼ ତୈଳ ଚୁକ୍ତି” ବୋଲି ଦାବି କରିଛନ୍ତି।
ଟ୍ରମ୍ପ ଶୁକ୍ରବାର ନିଜ ସୋସିଆଲ ମିଡିଆ ପ୍ଲାଟଫର୍ମ ‘ଟ୍ରୁଥ୍ ସୋସିଆଲ’ରେ ଏନେଇ ସୂଚନା ଦେଇଛନ୍ତି। ତାଙ୍କ କହିବା ଅନୁସାରେ, ଏହି ଚୁକ୍ତି ଦ୍ୱାରା ଆମେରିକାର ତୈଳ ଭଣ୍ଡାର ଦୁଇଗୁଣରୁ ଅଧିକ ବଢ଼ିବ ଏବଂ ଦେଶର ତୈଳ ଯୋଗାଣ ବୃଦ୍ଧି ପାଇବ। ଏହା ଫଳରେ ଆମେରିକାରେ ଦୀର୍ଘ ସମୟ ପାଇଁ ପେଟ୍ରୋଲ-ଡିଜେଲ ଦର କମିବାରେ ସହାୟତା ମିଳିପାରେ ବୋଲି ଟ୍ରମ୍ପ କହିଛନ୍ତି।
ରିପୋର୍ଟ ଅନୁସାରେ, ଆମେରିକୀୟ କମ୍ପାନୀଗୁଡ଼ିକୁ ଭେନେଜୁଏଲାର ତୈଳ କ୍ଷେତ୍ରରେ ନିବେଶ ଓ ବିକାଶ କରିବାକୁ ସୁଯୋଗ ମିଳିବ। ଏହା ବଦଳରେ ଆମେରିକୀୟ ପକ୍ଷକୁ ତୈଳ କ୍ଷେତ୍ରରେ ମାଲିକାନା ଅଂଶୀଦାରିତ୍ୱ ମିଳିବ ବୋଲି ଦୁଇଜଣ ଆମେରିକୀୟ ଅଧିକାରୀଙ୍କୁ ଉଦ୍ଧୃତ କରି ଆକ୍ସଅସ୍ ରିପୋର୍ଟ କରିଛି। ଟ୍ରମ୍ପ କହିଛନ୍ତି, ଆମେରିକାର ବିଦେଶ ମନ୍ତ୍ରୀ ମାର୍କୋ ରୁବିଓ ଏବଂ ଯୁଦ୍ଧ ମନ୍ତ୍ରୀ ପିଟ୍ ହେଗସେଥ୍ ଭେନେଜୁଏଲାର ରାଷ୍ଟ୍ରପତି ଡେଲସି ରୋଡ୍ରିଗେଜଙ୍କ ସହ ଏହି ଚୁକ୍ତି ନେଇ ଘନିଷ୍ଠ ଭାବେ କାମ କରୁଛନ୍ତି।