“ହିନ୍ଦୁମାନଙ୍କୁ କରାଯାଇଥିଲା ଟାର୍ଗେଟ, ମୁର୍ଶିଦାବାଦ ହିଂସା ପଛରେ ଟିଏମସି ନେତାଙ୍କ ହାତ”: ଆସିଲା ରିପୋର୍ଟ

କୋଲକାତା,୨୦।୫: ଗତ ମାସରେ ମୁର୍ଶିଦାବାଦରେ ସଂଘଟିତ ହିଂସାରେ ପଶ୍ଚିମବଙ୍ଗର ଶାସକ ତୃଣମୂଳ କଂଗ୍ରେସର ଜଣେ ନେତା ସାମିଲ ଥିଲେ ବୋଲି କୋଲକାତା ହାଇକୋର୍ଟ ଦ୍ୱାରା ଗଠିତ ତଦନ୍ତ କମିଟିର ରିପୋର୍ଟରେ ଦାବି କରାଯାଇଛି। ଓ୍ଵାକଫ୍ ସଂଶୋଧନ ବିଲ୍ ପାସ ସମୟରେ ଘଟିଥିବା ଏହି ଆକ୍ରମଣ ହିନ୍ଦୁମାନଙ୍କ ଉପରେ କେନ୍ଦ୍ରୀଭୂତ ଥିଲା ଏବଂ ଯେତେବେଳେ ଆକ୍ରାନ୍ତ ଲୋକେ ସାହାଯ୍ୟ ପାଇଁ ଡାକିଥିଲେ, ପୋଲିସ କୌଣସି ସାହାଯ୍ୟ କରିବାରେ ବିଫଳ ହୋଇଥିଲା ବୋଲି ରିପୋର୍ଟରେ ଉଲ୍ଲେଖ କରାଯାଇଛି।

ରିପୋର୍ଟରେ ଅଗ୍ନିସଂଯୋଗ, ଲୁଟପାଟ ଏବଂ ଦୋକାନ ଓ ମଲ୍‌ଗୁଡ଼ିକର ନିରନ୍ତର ଧ୍ୱଂସକୁ ମଧ୍ୟ ଆଲୋକପାତ କରାଯାଇଛି। “ଆକ୍ରମଣଗୁଡ଼ିକ ସ୍ଥାନୀୟ କାଉନସିଲର ମେହବୁବ ଆଲମଙ୍କ ଦ୍ୱାରା ନିର୍ଦ୍ଦେଶିତ ହୋଇଥିଲା… ସ୍ଥାନୀୟ ପୁଲିସ ସମ୍ପୂର୍ଣ୍ଣ ନିଷ୍କ୍ରିୟ ଏବଂ ଅନୁପସ୍ଥିତ ଥିଲା,” ରିପୋର୍ଟରେ ଉଲ୍ଲେଖ କରାଯାଇଛି।

ମୁଖ୍ୟ ଆକ୍ରମଣ ଶୁକ୍ରବାର, ଏପ୍ରିଲ ୧୧ରେ ଅପରାହ୍ନ ୨:୩୦ ପରେ ହୋଇଥିଲା, ଯେତେବେଳେ “ସ୍ଥାନୀୟ କାଉନସିଲର ମେହବୁବ ଆଲମ ଦୁର୍ବୃତ୍ତମାନଙ୍କ ସହ ଆସିଥିଲେ।” “ବେଟବୋନା ଗାଁରେ ୧୧୩ଟି ଘର ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଥିଲା,” ରିପୋର୍ଟରେ ଉଲ୍ଲେଖ କରାଯାଇଛି।

ତଦନ୍ତ ଦଳରେ ଜାତୀୟ ମାନବାଧିକାର ଆୟୋଗ, ରାଜ୍ୟ ଆଇନଗତ ସେବା ପ୍ରାଧିକାରୀ ଏବଂ ନ୍ୟାୟିକ ସେବାର ସଦସ୍ୟମାନେ ସାମିଲ ଥିଲେ। ଏହି ରିପୋର୍ଟ ଆଜି ହାଇକୋର୍ଟର ଏକ ଡିଭିଜନ ବେଞ୍ଚ ଆଗରେ ଦାଖଲ କରାଯାଇଛି।