ଅନଲାଇନ୍ ଶିଶୁ ଯୌନ ଶୋଷଣର ବଡ଼ ରାକେଟକୁ ଧରିଲା ସିବିଆଇ

ନୂଆଦିଲ୍ଲୀ : କେନ୍ଦ୍ରୀୟ ତଦନ୍ତ ବ୍ୟୁରୋ ଆନ୍ତର୍ଜାତିକ ସଂସ୍ଥା ଜଡିତ ଥିବା ଅନଲାଇନ୍ ଶିଶୁ ଯୌନ ଶୋଷଣର ସାଇବର କ୍ରାଇମ ନେଟୱାର୍କକୁ ଠାବ କରିଛି। ଆମେରିକାରୁ ମିଳିଥିବା ସୂଚନା ଆଧାରରେ ଆରମ୍ଭ ହୋଇଥିବା ଅପରେସନ ହକ୍ ଅଧୀନରେ ସିବିଆଇ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି।
ସିବିଆଇ ଏହାର ବିବୃତ୍ତିରେ ସୂଚନା ଦେଇଛି ଯେ ସିବିଆଇର ଇଣ୍ଟରନ୍ୟାସନାଲ ଅପରେସନ୍ ଡିଭିଜନ୍ ଦିଲ୍ଲୀ ଏବଂ ମାଙ୍ଗାଲୋରରେ ରହୁଥିବା ଦୁଇ ଅଭିଯୁକ୍ତଙ୍କ ବିରୋଧରେ ଭାରତୀୟ ଆଇନ ଅନୁଯାୟୀ ମାମଲା ରୁଜୁ କରିଛି। ସିବିଆଇ କହିଛି ଯେ ତଦନ୍ତ ସମୟରେ ଜାଣିବାକୁ ପାଇଥିଲା ଯେ ଅଭିଯୁକ୍ତମାନେ ସୋସିଆଲ ମିଡିଆ ପ୍ଲାଟଫର୍ମ ‘ଡିସକର୍ଡ’ ଜରିଆରେ ଆମେରିକାର ନାବାଳିକାଙ୍କ ସହ ଆପତ୍ତିଜନକ କଥାବାର୍ତ୍ତା କରୁଥିଲେ। ଏଜେନ୍ସି କହିଛି ଯେ ଅଭିଯୁକ୍ତମାନେ ନାବାଳିକା ପୀଡ଼ିତାଙ୍କୁ ତାଙ୍କ ଅଶ୍ଳୀଳ ଫଟୋ ଏବଂ ଭିଡିଓ ସେୟାର କରିବା ଜାରି ରଖିବାକୁ ମଧ୍ୟ ଧମକ ଦେଇଥିଲେ।
ଏହି ମାମଲାରେ ସିବିଆଇ ଟିମ୍ ଅଭିଯୁକ୍ତଙ୍କ ସହ ଜଡିତ ଦିଲ୍ଲୀର ବିଭିନ୍ନ ସ୍ଥାନରେ ବ୍ୟାପକ ଚଢ଼ାଉ କରି ଇଲେକ୍ଟ୍ରୋନିକ୍ ଉପକରଣ ଜବତ କରିଛି। ସିବିଆଇ କହିଛି ଯେ ଅନଲାଇନ୍ ଶିଶୁ ଯୌନ ଶୋଷଣର ମୁକାବିଲା ଏବଂ ବିଶ୍ୱସ୍ତରରେ ଶିଶୁଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ ଏହାର ଟିମ୍ ପ୍ରତିଶ୍ରୁତିବଦ୍ଧ।