ମହଙ୍ଗା ହେବ କର୍କଟ, ମଧୁମେହ ଔଷଧ
ନୂଆଦିଲ୍ଲୀ: କର୍କଟ, ମଧୁମେହ, ହୃଦ୍ରୋଗ ଓ ଅନ୍ୟ ଆଣ୍ଟିବାୟୋଟିକ୍ ସହିତ ସରକାରୀ ନିୟନ୍ତ୍ରଣରେ ଥିବା ଅନ୍ୟ ଔଷଧ ଦର ବୃଦ୍ଧି ହେବାକୁ ଯାଉଛି। ଔଷଧ ଦର ପ୍ରାୟ ୧.୭ ପ୍ରତିଶତ ମହଙ୍ଗା ହେବ ବୋଲି ସୂଚନା ମିଳିଛି। ସରକାରୀ ନିୟନ୍ତ୍ରଣରେ ଥିବା କର୍କଟ, ମଧୁମେହ, ହୃଦ୍ରୋଗ ଓ ଅନ୍ୟ ଆଣ୍ଟିବାୟୋଟିକ୍ ଔଷଧ ଦର ଖୁବ୍ଶୀଘ୍ର ବଢ଼ିବାକୁ ଯାଉଛି। ଏହି ସମସ୍ତ ଔଷଧ ଦର ପ୍ରାୟ ୧.୭ ପ୍ରତିଶତ ପର୍ଯ୍ୟନ୍ତ ବୃଦ୍ଧି ହୋଇପାରେ ବୋଲି ଆଶା କରାଯାଉଛି। ତେବେ ଔଷଧ ଉତ୍ପାଦନ ପାଇଁ ଆବଶ୍ୟକ କଞ୍ଚାମାଲ ଓ ଅନ୍ୟ ଖର୍ଚ୍ଚ ବଢ଼ୁଥିବାରୁ ଔଷଧ ଶିଳ୍ପକୁ ଲାଭ ଦେବା ପାଇଁ ଏହି ପଦକ୍ଷେପ ନିଆଯାଇଥିବା ଅଖିଳ ଭାରତୀୟ କେମିଷ୍ଟ୍ ଆଣ୍ଡ୍ ଡ୍ରଗିଷ୍ଟ ସଂଗଠନ ର ମହାସଚିବ ରାଜୀବ ସିଂଘଲ କହିଛନ୍ତି। ତେବେ ଏହି ଦର ବୃଦ୍ଧି ଘୋଷଣା ହେବାର ପ୍ରାୟ ୯୦ ଦିନ ପରେ ନୂଆ ଔଷଧ ବଜାରରେ ଉପଲବ୍ଧ ହେବ।
ରାସାୟନିକ ଏବଂ ସାର ଉପରେ ସଂସଦୀୟ ସ୍ଥାୟୀ କମିଟିର ଏକ ଅଧ୍ୟୟନରୁ ଜଣାପଡ଼ିଛି ଯେ ଔଷଧ କମ୍ପାନୀ ଅନୁମୋଦିତ ମୂଲ୍ୟ ବୃଦ୍ଧି ଅତିକ୍ରମ କରି ଔଷଧର ମୂଲ୍ୟ ନିର୍ଦ୍ଧାରଣ ଉପରେ ନିୟମାବଳୀକୁ ବାରମ୍ବାର ଉଲ୍ଲଂଘନ କରୁଛି। ଔଷଧର ମୂଲ୍ୟ ନିର୍ଦ୍ଧାରଣ କରୁଥିବା ଭାରତର ନିୟାମକ ସଂସ୍ଥା ‘ଜାତୀୟ ଔଷଧ ମୂଲ୍ୟ ନିର୍ଦ୍ଧାରଣ ପ୍ରାଧିକରଣ ଔଷଧ କମ୍ପାନୀ ଉଲ୍ଲଂଘନ କରିଥିବା ୩୦୭ଟି ମାମଲା ଚିହ୍ନଟ କରିଛି। ଏନ୍ପିପିଏ ଔଷଧର ସର୍ବାଧିକ ମୂଲ୍ୟ ସ୍ଥିର କରେ। ସମସ୍ତ ନିର୍ମାତା ଏବଂ ବିପଣନକାରୀ ଏନ୍ପିପିଏ ଦ୍ୱାରା ନିର୍ଦ୍ଧାରିତ ସର୍ବାଧିକ ମୂଲ୍ୟ କିମ୍ବା ତା’ଠାରୁ କମ୍ ମୂଲ୍ୟରେ ସେମାନଙ୍କ ଉତ୍ପାଦ ବିକ୍ରି କରିବା ଉଚିତ। ଚଳିତ ମାସ ଆରମ୍ଭରେ, ରସାୟନ ଏବଂ ସାର ମନ୍ତ୍ରଣାଳୟ କହିଛି ଯେ ଜାତୀୟ ଅତ୍ୟାବଶ୍ୟକୀୟ ଔଷଧ ତାଲିକା, ୨୦୨୨ରେ ତାଲିକାଭୁକ୍ତ ଔଷଧର ମୂଲ୍ୟ ସୀମା ଯୋଗୁଁ ହାରାହାରି ମୂଲ୍ୟ ହ୍ରାସ ରୋଗୀଙ୍କ ପାଇଁ ବାର୍ଷିକ ଆନୁମାନିକ ପ୍ରାୟ ୩,୭୮୮ କୋଟି ଟଙ୍କା ସଞ୍ଚୟ କରିଛି।