ବିଦେଶ ମନ୍ତ୍ରୀ ଏସ ଜୟଶଙ୍କର, ସିବିଆଇ ନିର୍ଦ୍ଦେଶକ ଓ ପୂର୍ବତନ ସେନାମୁଖ୍ୟଙ୍କୁ ଏସ୍ଆଇଆର ନୋଟିସ୍
ନୂଆଦିଲ୍ଲୀ: ଦିଲ୍ଲୀ ଭୋଟର ତାଲିକାର ସ୍ୱତନ୍ତ୍ର ସଂଶୋଧନ (ଏସ୍ଆଇଆର୍) ପ୍ରକ୍ରିୟା ଅଧୀନରେ ବିଦେଶ ମନ୍ତ୍ରୀ ଏସ ଜୟଶଙ୍କର, ସିବିଆଇ ନିର୍ଦ୍ଦେଶକ ପ୍ରବୀଣ ସୁଦ୍ ଏବଂ ପୂର୍ବତନ ସେନାମୁଖ୍ୟ ଜେନେରାଲ ଉପେନ୍ଦ୍ର ଦ୍ୱିବେଦୀଙ୍କ ସମେତ ଅନେକ ଅତି ବିଶିଷ୍ଟ ବ୍ୟକ୍ତିଙ୍କୁ ନିର୍ବାଚନ କମିସନ ନୋଟିସ ଜାରି କରିଛନ୍ତି। ନୂଆଦିଲ୍ଲୀ ନିର୍ବାଚନ ମଣ୍ଡଳୀରେ ଚାଲିଥିବା ଏହି ଯାଞ୍ଚ ପ୍ରକ୍ରିୟାରେ ତଥ୍ୟ ମେଳ ନଖାଇବା ଏବଂ ଅନ୍-ମ୍ୟାପ୍ଡ ନାମ ରହିଥିବାରୁ ଏହି ପଦକ୍ଷେପ ନିଆଯାଇଛି। କେନ୍ଦ୍ରମନ୍ତ୍ରୀ ଜୟଶଙ୍କର ଏବଂ ତାଙ୍କ ପତ୍ନୀ କ୍ୟୋକୋ ଏସ୍ ଜୟଶଙ୍କରଙ୍କୁ ‘ଗତ ଏସ୍ଆଇଆର୍ ସହ ଅନ୍-ମ୍ୟାପ୍ଡ’ ଶ୍ରେଣୀରେ ରଖାଯାଇଛି। ଏହା ଦର୍ଶାଉଛି ଯେ ସେମାନଙ୍କ ବର୍ତ୍ତମାନର ଭୋଟର ତଥ୍ୟ ୨୦୦୨ର ପୂର୍ବ ସଂଶୋଧନ ତାଲିକା ସହ ଯୋଡ଼ି ହୋଇପାରି ନାହିଁ।
ଏହି ସମାନ ଶ୍ରେଣୀ ଅଧୀନରେ ପୂର୍ବତନ ସେନାମୁଖ୍ୟ ଜେନେରାଲ ଉପେନ୍ଦ୍ର ଦ୍ୱିବେଦୀ ଏବଂ ତାଙ୍କ ପତ୍ନୀ ସୁନିତା ଦ୍ୱିବେଦୀଙ୍କୁ ମଧ୍ୟ ନୋଟିସ ମିଳିଛି। ସେମାନେ ମଧ୍ୟ ନୂଆଦିଲ୍ଲୀ ବିଧାନସଭା ନିର୍ବାଚନ ମଣ୍ଡଳୀରେ ଭୋଟର ଭାବେ ପଞ୍ଜୀକୃତ ରହିଛନ୍ତି। ଅନ୍ୟପଟେ ସିପିଏମ୍ ସାଂସଦ ଜନ୍ ବ୍ରିଟାସ୍ଙ୍କ ପତ୍ନୀ ଶେବା ବ୍ରିଟାସ୍ ଏବଂ ପୁଅ ଆନନ୍ଦ ବ୍ରିଟାସ୍ଙ୍କୁ ମିଳିଥିବା ନୋଟିସରେ ଭିନ୍ନ ତ୍ରୁଟି ଦର୍ଶାଯାଇଛି। ଶେବାଙ୍କ କ୍ଷେତ୍ରରେ ‘ନିଜ ନାମ ମେଳ ନଖାଇବା’ ତ୍ରୁଟି ରହିଥିବା ବେଳେ ଆନନ୍ଦଙ୍କ ନୋଟିସରେ ‘ପିତାମାତାଙ୍କ ନାମ ମେଳ ନଖାଇବା’ ଦର୍ଶାଯାଇଛି।