କ୍ରମାଗତ ଚତୁର୍ଥ ଦିନ ପାଇଁ ବଢ଼ିଲା ଅଶୋଧିତ ତୈଳ ଦର, ବଢୁଛି ଆମେରିକା-ଇରାନ ଯୁଦ୍ଧ ଆଶଙ୍କା

ନୂଆଦିଲ୍ଲୀ : ଆମେରିକା ଏବଂ ଇରାନ ମଧ୍ୟରେ ଲାଗି ରହିଥିବା ଯୁଦ୍ଧ ପରିସ୍ଥିତି ଏବଂ ରାଜନୈତିକ ଉତ୍ତେଜନା ବିଶ୍ୱ ଅର୍ଥନୀତି ପାଇଁ ଏବେ ଚିନ୍ତାର କାରଣ ପାଲଟିଛି। ଏହାର ସିଧାସଳଖ ପ୍ରଭାବ ବିଶ୍ୱ ତୈଳ ବଜାର ଉପରେ ପଡ଼ୁଥିବା ଦେଖିବାକୁ ମିଳିଛି। ଫଳସ୍ୱରୂପ, କ୍ରମାଗତ ଚତୁର୍ଥ ଦିନ ପାଇଁ ଅଶୋଧିତ ତୈଳ ଦର ବୃଦ୍ଧି ପାଇଛି। ବିଶେଷ କରି ତୈଳ ପରିବହନ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ତଥା ରଣନୈତିକ ମାର୍ଗ ଭାବେ ବିବେଚନା କରାଯାଉଥିବା ‘ହରମୁଜ୍ ପ୍ରଣାଳୀ’ ଦେଇ ଜାହାଜ ଚଳାଚଳକୁ ନେଇ ଅନିଶ୍ଚିତତା ସୃଷ୍ଟି ହୋଇଛି, ଯାହାକି ବିଶ୍ୱ ତୈଳ ଯୋଗାଣରେ ବାଧା ଉପୁଜାଇବାର ଆଶଙ୍କା ସୃଷ୍ଟି କରିଛି।

ଏସୀୟ ବଜାରରେ ବୁଧବାର ପ୍ରାରମ୍ଭିକ କାରବାର ସମୟରେ ବ୍ରେଣ୍ଟ କ୍ରୁଡ୍ ଦର ବ୍ୟାରେଲ ପିଛା ୨୬ ସେଣ୍ଟସ୍ ବା ୦.୨୯ ପ୍ରତିଶତ ବୃଦ୍ଧି ପାଇ ୯୧.୨୮ ଡଲାରରେ ପହଞ୍ଚିଛି। ସେହିପରି ଆମେରିକାର ୱେଷ୍ଟ ଟେକ୍ସାସ୍ ଇଣ୍ଟରମିଡିଏଟ୍ କ୍ରୁଡ୍ ଦର ୩୭ ସେଣ୍ଟସ୍ ବଢ଼ି ବ୍ୟାରେଲ ପିଛା ୮୫.୩୧ ଡଲାର ଛୁଇଁଛି। ହରମୁଜ୍ ପ୍ରଣାଳୀର ବ୍ୟବହାରକୁ ନେଇ ଆମେରିକା ଏବଂ ଇରାନ ମଧ୍ୟରେ ଏବେ ପରସ୍ପର ବିରୋଧୀ ବୟାନବାଜି ଚାଲିଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଙ୍ଗଳବାର ଦିନ ସ୍ପଷ୍ଟ କରିଛନ୍ତି ଯେ ଇରାନ ସହ କୌଣସି ଆଲୋଚନା ଚାଲିନାହିଁ ଏବଂ ଏହି ଜଳପଥ ପରିବହନ ପାଇଁ ସମ୍ପୂର୍ଣ୍ଣ ଖୋଲା ଅଛି। ମାତ୍ର ଇରାନ ଏହାକୁ ଖଣ୍ଡନ କରି କହିଛି ଯେ ବ୍ୟବସାୟିକ ଜାହାଜ ଚଳାଚଳ ପାଇଁ ଏହି ମାର୍ଗ ବନ୍ଦ ରହିଛି।