କେନ୍ଦ୍ର ବଜେଟ୍ ୨୦୨୪ ପୂର୍ବରୁ ଅର୍ଥମନ୍ତ୍ରୀଙ୍କ ଉପସ୍ଥିତିରେ ହାଲୱା ସମାରୋହ ଅନୁଷ୍ଠିତ
ନୂଆଦିଲ୍ଲୀ: ୟୁନିୟନ ବଜେଟ୍ ୨୦୨୪ ପାଇଁ ବଜେଟ୍ ପ୍ରସ୍ତୁତି ପ୍ରକ୍ରିୟାର ଶେଷ ପର୍ଯ୍ୟାୟରେ ମଙ୍ଗଳବାର ଅର୍ଥ ମନ୍ତ୍ରଣାଳୟ ଅର୍ଥାତ୍ ନର୍ଥ ବ୍ଲକ୍ରେ ହାଲୱା ସମାରୋହ ଆୟୋଜିତ ହୋଇଥିଲା। ନର୍ଥ ବ୍ଲକ୍ରେ କେନ୍ଦ୍ର ଅର୍ଥ ଓ କର୍ପୋରେଟ ମନ୍ତ୍ରୀ ନିର୍ମଳା ସୀତାରମଣଙ୍କ ଉପସ୍ଥିତିରେ ହାଲୱା ସମାରୋହ ଆୟୋଜିତ ହୋଇଥିଲା। ଏକ ପରମ୍ପରା ଅନୁଯାୟୀ, ବଜେଟ୍ ପ୍ରସ୍ତୁତିର “ଲକ୍-ଇନ୍” ପ୍ରକ୍ରିୟା ଆରମ୍ଭ ହେବା ପୂର୍ବରୁ ପ୍ରତିବର୍ଷ ହାଲୱା ସମାରୋହ ଆୟୋଜିତ ହୋଇଥାଏ।
ବଜେଟ ପୂର୍ବରୁ ଅର୍ଥମନ୍ତ୍ରୀଙ୍କ ଦ୍ୱାରା ଏହି ହାଲୱା ସମାରୋହ ସୂଚିତ କରେ ଯେ ବଜେଟ୍ ଚୂଡାନ୍ତ ହୋଇଛି ଏବଂ ଏହାର ମୁଦ୍ରଣ କାର୍ଯ୍ୟ ଆରମ୍ଭ ହୋଇଛି। ଏହି ସମାରୋହରେ ବଜେଟ୍ ପ୍ରସ୍ତୁତ କରୁଥିବା ବହୁ ସଂଖ୍ୟକ ଅଧିକାରୀ ଏବଂ କର୍ମଚାରୀଙ୍କୁ କୃତଜ୍ଞତା ପ୍ରକାଶ କରାଯାଇଛି। ବାସ୍ତବରେ, ଅର୍ଥ ମନ୍ତ୍ରଣାଳୟର ବଜେଟ୍ ବିଭାଗର ସମସ୍ତ ଅଧିକାରୀ ଯେଉଁମାନେ ବଜେଟ୍ ପ୍ରସ୍ତୁତ କରିବାରେ ନିୟୋଜିତ ଥାନ୍ତି ।
ସେମାନେ ସଂସଦରେ ବଜେଟ୍ ଉପସ୍ଥାପିତ ନ ହେବା ପର୍ଯ୍ୟନ୍ତ ସେମାନଙ୍କ ପରିବାର ସହ ଯୋଗାଯୋଗ କରିବାକୁ ଅନୁମତି ଦିଆଯାଇ ନ ଥାଏ। ଏଭଳି ପରିସ୍ଥିତିରେ ସରକାର ସେମାନଙ୍କ ପରିଶ୍ରମ ପାଇଁ କୃତଜ୍ଞତା ଜଣାଇବା ପାଇଁ ହାଲୱା ସମାରୋହ ଆୟୋଜନ କରିଥାନ୍ତି।
ବଜେଟ୍ ମୁଦ୍ରଣ ପୂର୍ବରୁ ହାଲୱା ସମାରୋହ ଏକ ପାରମ୍ପାରିକ କାର୍ଯ୍ୟକ୍ରମ। କୁହାଯାଏ ଯେ ଦୀର୍ଘ ବଜେଟ୍ ତିଆରି ପ୍ରକ୍ରିୟା ଶେଷ ହେବା ପରେ ମିଠା ଖାଇ ବଜେଟର ମୁଦ୍ରଣ ଆନୁଷ୍ଠାନିକ ଭାବେ ଆରମ୍ଭ ହୋଇଥାଏ। ଅର୍ଥମନ୍ତ୍ରୀ କଡେଇରୁ ଅଧିକାରୀମାନଙ୍କୁ ହାଲୱା ପ୍ରଦାନ କରି ବଜେଟ୍ ମୁଦ୍ରଣ ପାଇଁ ସବୁଜ ସଙ୍କେତ ପ୍ରଦାନ କରିଥାନ୍ତି। ଅର୍ଥ ମନ୍ତ୍ରଣାଳୟର ନର୍ଥ ବ୍ଲକର ତଳ ମହଲାରେ ଏହି ଉତ୍ସବ ଅନୁଷ୍ଠିତ ହୋଇଥାଏ, ଯେଉଁଠାରେ ବଜେଟ୍ ମୁଦ୍ରଣ ପାଇଁ ଏକ ସ୍ୱତନ୍ତ୍ର ପ୍ରିଣ୍ଟିଂ ପ୍ରେସ୍ ରହିଛି।
ବଜେଟ୍ ପ୍ରସ୍ତୁତି ସମୟରେ ସମ୍ପୂର୍ଣ୍ଣ ଗୋପନୀୟତା ବଜାୟ ରଖାଯାଇଥାଏ। କୁହାଯାଏ ଯେ ସଂସଦରେ ବଜେଟ୍ ଉପସ୍ଥାପନା ପୂର୍ବରୁ ଅର୍ଥ ମନ୍ତ୍ରଣାଳୟର ଅଧିକାରୀ ଏବଂ କର୍ମଚାରୀମାନେ ନର୍ଥ ବ୍ଲକର ତଳ ମହଲାରେ ପ୍ରାୟ ୧୦ ଦିନ ରହିଥାନ୍ତି। ଯେଉଁଠାରେ ସମ୍ପୂର୍ଣ୍ଣ ଗୋପନୀୟତା ବଜାୟ ରଖାଯାଇଥାଏ।
ମନ୍ତ୍ରଣାଳୟର ଅଧିକାରୀ ଏବଂ କର୍ମଚାରୀମାନେ ଇଣ୍ଟେଲିଜେନ୍ସ ବ୍ୟୁରୋ ଦ୍ବାରା ୨୪ ଘଣ୍ଟା ନଜରରେ ରହିଥାନ୍ତି ଏବଂ ସେମାନଙ୍କ ପ୍ରିୟଜନଙ୍କ ସହ ଯୋଗାଯୋଗ କରିବାକୁ ମଧ୍ୟ ଅନୁମତି ମିଳି ନ ଥାଏ। ଏପରିକି ସେମାନଙ୍କୁ ଫୋନ୍ କଲ କରିବାକୁ ଅନୁମତି ଦିଆଯାଏ ନାହିଁ। ସେମାନଙ୍କୁ ସିସିଟିଭି ଏବଂ ଜାମରର ଏକ ଶକ୍ତିଶାଳୀ ନେଟୱାର୍କ ମାଧ୍ୟମରେ ବାହ୍ୟ ଯୋଗାଯୋଗରୁ ବିଚ୍ଛିନ୍ନ କରାଯାଇଥାଏ।
କୁହାଯାଏ ବଜେଟ୍ ଡକ୍ୟୁମେଣ୍ଟଗୁଡିକର ମୁଦ୍ରଣ ୧୯୫୦ ପର୍ଯ୍ୟନ୍ତ ରାଷ୍ଟ୍ରପତି ଭବନରେ ଜାରି ରହିଥିଲା କିନ୍ତୁ ସେହି ବର୍ଷ ବଜେଟ ଲିକ୍ ହେବା ପରେ ଏହାକୁ ମିଣ୍ଟୋ ରୋଡକୁ ଏବଂ ପରେ ନର୍ଥ ବ୍ଲକର ବେସମେଣ୍ଟକୁ ସ୍ଥାନାନ୍ତର କରାଯାଇଥିଲା। ଏହା ପରେ ବଜେଟର ମୁଦ୍ରଣ ଏହି ପ୍ରିଣ୍ଟିଂ ପ୍ରେସରେ ସ୍ଥାୟୀ ଭାବରେ କରାଯାଇଥିଲା।