୩୩ବର୍ଷ ପୂର୍ବେ ରାମ ମନ୍ଦିର ନିର୍ମାଣର ଭବିଷ୍ୟବାଣୀ କରିଥିଲେ ଏହି ବାବା
ନୂଆଦିଲ୍ଲୀ: ଅଯୋଧ୍ୟାରେ ଶ୍ରୀ ରାମମନ୍ଦିରରେ ରାମଲଲାଙ୍କ ପ୍ରାଣପ୍ରତିଷ୍ଠା ପାଇଁ ଜୋରସୋର ପ୍ରସ୍ତୁତି ଚାଲିଛି। ରାମ ମନ୍ଦିର ଟ୍ରଷ୍ଟ ପକ୍ଷରୁ ପ୍ରାଣପ୍ରତିଷ୍ଠା ସମାରୋହରେ ସାମିଲ ହେବା ପାଇଁ ବିଶିଷ୍ଟ ବ୍ୟକ୍ତିମାନଙ୍କୁ ନିମନ୍ତ୍ରଣ ପଠାଯାଇଛି। ଏହି କ୍ରମରେ ଉତ୍ତରପ୍ରଦେଶର ଦେବରିଆ ଜିଲ୍ଲାର ମଇଲସ୍ଥିତ ବ୍ରହ୍ମାଋଷି ଦେବରହା ବାବା ଆଶ୍ରମର ମହନ୍ତଙ୍କୁ ବି ନିମନ୍ତ୍ରଣ ପଠାଯାଇଛି। ଏହି ନିମନ୍ତ୍ରଣ ପାଇବା ପରେ ମହନ୍ତ ଶ୍ୟାମ ସୁନ୍ଦର ଦାସ ମହାରାଜ ଖୁବ ଉତ୍ସାହିତ ହୋଇଯାଇଛନ୍ତି।
ମହନ୍ତ ଶ୍ୟାମ ସୁନ୍ଦର କହିଛନ୍ତି , ‘ଯେଉଁ ମହାପୁରୁଷଙ୍କ ଆର୍ଶୀବାଦରୁ ମନ୍ଦିର ନିର୍ମାଣ ହୋଇଛି ସେଠାରେ ଏବେ ରାମଲଲାଙ୍କ ପ୍ରାଣପ୍ରତିଷ୍ଠା ହେବ। ନିମନ୍ତ୍ରଣ ପତ୍ର ଆସିବା ସୌଭାଗ୍ୟର କଥା। ଭଗବାନଙ୍କ କୃପାରୁ ମୁଁ ଅଯୋଧ୍ୟା ନିଶ୍ଚିୟ ଯିବି।
ମନ୍ଦିର ନିର୍ମାଣ ପ୍ରସଙ୍ଗରେ ପାଖାପାଖି ୩୩ବର୍ଷ ପୂର୍ବେ ଦେବରହା ବାବା ଆରଏସଏସକୁ ନେଇ ବିଶ୍ବ ହିନ୍ଦୁ ପରିଷଦର ନେତାଙ୍କ ସମ୍ମୁଖରେ ଭବିଷ୍ୟବାଣୀ କରିଥିଲେ। ନିଜେ ଅଶୋକ ସିଙ୍ଘଲ ବାବାଙ୍କୁ ଭେଟିଥିଲେ। ଆହ୍ଲାବାଦରେ ରାମଙ୍କ ଜନ୍ମଭୂମିକୁ ନେଇ ସଭାର ଆୟୋଜନ ହୋଇଥିଲା। ସେଠାରେ ଶଙ୍କରାଚାର୍ଯ୍ୟ ବି ଥିଲେ। ସେତେବେଳେ ବାବା କହିଥିଲେ ବିଳମ୍ବ ହେବ କିନ୍ତୁ ମନ୍ଦିର ନିର୍ମାଣର ଇଚ୍ଛା ନିଶ୍ଚୟ ପୂର୍ଣ୍ଣ ହେବ। ହିନ୍ଦୁ ମୁସଲମାନ ସମସ୍ତେ ମିଶି ଏକ ହୋଇ କାମ କରିବେ।’
ଜାନୁଆରି ୨୨ ତାରିଖରେ ଅଯୋଧ୍ୟା ନବନର୍ମିତ ରାମ ମନ୍ଦିରରେ ରାମଲଲାଙ୍କ ପ୍ରାଣପ୍ରତିଷ୍ଠା ପାଇଁ ୮୪ ସେକେଣ୍ଡର ଶୁଭ ମୁହୂର୍ତ୍ତ ରହିଛି। ଏହି ଶୁଭ ମୁହୂର୍ତ୍ତରେ ରାମଲଲାଙ୍କ ପ୍ରାଣପ୍ରତିଷ୍ଠା ହେବ। ଏହାର ସମୟ ୧୨ଟା ୨୯ ମିନିଟ ୮ ସେକେଣ୍ଡରୁ ଆରମ୍ଭ ହୋଇ ୧୨ଟା ୩୦ମିନିଟ ୩୨ ସେକେଣ୍ଡରେ ଶେଷ ହେବ।