ଆସନ୍ତାକାଲି ଦେଶର ପ୍ରଥମ ଅଣ୍ଡର ୱାଟର ମେଟ୍ରୋକୁ ଉଦଘାଟନ କରିବେ ପ୍ରଧାନମନ୍ତ୍ରୀ ମୋଦୀ

କୋଲକାତା: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆସନ୍ତାକାଲି ଦେଶର ପ୍ରଥମ ‘ଅଣ୍ଡର ୱାଟର ମେଟ୍ରୋ ଟ୍ରେନ’ର ଉଦଘାଟନ କରିବେ। ହୁଗଳି ନଦୀ ତଳେ କୋଲକାତାର ‘ଅଣ୍ଡର ୱାଟର ମେଟ୍ରୋ’ ନିର୍ମାଣ କରାଯାଇଛି। କିଛି ଦିନ ପୂର୍ବରୁ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ କୋଲକାତା ମେଟ୍ରୋ (କୋଲକାତା ଅଣ୍ଡର ୱାଟର ମେଟ୍ରୋ) ରେଳ ସେବାର ସମୀକ୍ଷା କରିଥିଲେ। ସମୀକ୍ଷା ପରେ କାଲି ପ୍ରଧାନମନ୍ତ୍ରୀ ମୋଦୀ ଏହାକୁ ଦେଶ ପାଇଁ ଉତ୍ସର୍ଗ କରିବେ। ‘ଅଣ୍ଡର ୱାଟର ମେଟ୍ରୋ’ ବ୍ୟତୀତ ପ୍ରଧାନମନ୍ତ୍ରୀ ମୋଦୀ କବି ସୁଭାଷ-ହେମନ୍ତ ମୁଖୋପାଧ୍ୟାୟ ଏବଂ ତାରାତଲା-ମାଝେରହାଟ ମେଟ୍ରୋ ବିଭାଗର ଉଦଘାଟନ କରିବେ।
ଏହି ମେଟ୍ରୋ ଟ୍ରେନଟି ଏସପ୍ଲାନେଡ ଷ୍ଟେସନରୁ ହାୱଡ‌ା ମଇଦାନ ଷ୍ଟେସନ ପର୍ଯ୍ୟନ୍ତ ଯାତ୍ରା କରିବ | ଅଣ୍ଡର ୱାଟର ମେଟ୍ରୋ ଟ୍ରେନଟି ହୁଗଳି ନଦୀର ୩୨ମିଟର ତଳେ ଚାଲିବ। ଏହି ମେଟ୍ରୋ ଟ୍ରେନଟି ୪୫ ସେକେଣ୍ଡରେ ହୁଗଳି ନଦୀ ତଳେ ୫୨୦ମିଟର ଦୂରତା ଅତିକ୍ରମ କରିବ ବୋଲି ଆଶା କରାଯାଉଛି |

ଏହା ହେଉଛି ଦୁନିଆର ସବୁଠୁ ଗଭୀରରେ ଥିବା ମେଟ୍ରୋ ଷ୍ଟେସନ୍ | ବର୍ତ୍ତମାନ, ଅଣ୍ଡର ୱାଟର ମେଟ୍ରୋ ରୁଟ୍ କେବଳ ଲଣ୍ଡନ ଏବଂ ପ୍ୟାରିସରେ ରହିଛି |