ମହିଳା ପୁଲିସ ନିର୍ଯାତନା ମାମଲାରେ ବିରୋଧୀ ଦଳ ନେତାଙ୍କୁ ଅନ୍ତରୀଣ ଜାମିନ ଦେଲେ ସୁପ୍ରିମକୋର୍ଟ

ସମ୍ବଲପୁର: ଜଣେ ମହିଳା ପୁଲିସ ଅଧିକାରୀଙ୍କୁ ମାଡ଼ ମାରିବା ମାମଲାରେ ବିରୋଧୀ ଦଳ ନେତା ତଥା ବିଜେପି ବିଧାୟକ ଜୟନାରାୟଣ ମିଶ୍ରଙ୍କୁ ସୁପ୍ରିମକୋର୍ଟ ଅନ୍ତରୀଣ ସୁରକ୍ଷା ଦେଇଛନ୍ତି। ସର୍ବୋଚ୍ଚ ନ୍ୟାୟାଳୟ ତାଙ୍କୁ ଅନ୍ତରୀଣ ଜାମିନ ପ୍ରଦାନ କରିବା ସହ ରାଜ୍ୟ ସରକାରଙ୍କୁ ନୋଟିସ ଜାରି କରି ୪ ସପ୍ତାହ ମଧ୍ୟରେ ଜବାବ ଦେବାକୁ କହିଛନ୍ତି।

୨୦୨୩ ନଭେମ୍ବର ୨୩ ତାରିଖରେ ଓଡ଼ିଶା ହାଇକୋର୍ଟ ତାଙ୍କ ଆଗୁଆ ଜାମିନ ଆବେଦନ ଖାରଜ କରିବା ପରେ ଶ୍ରୀ ମିଶ୍ର ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଏହି ମାମଲାରେ ତାଙ୍କୁ ପୁଲିସ ଡକାଇ ନାହିଁ ଏବଂ ତାଙ୍କ ବିରୋଧରେ ଆସିଥିବା ଅଭିଯୋଗ ମିଥ୍ୟା ବୋଲି କହି ସେ ହାଇକୋର୍ଟଙ୍କ ଆଦେଶକୁ ଚ୍ୟାଲେଞ୍ଜ କରିଥିଲେ।

୨୦୨୦ ଫେବ୍ରୁଆରି ୧୫ ତାରିଖରେ ଜୟନାରାୟଣ ମିଶ୍ର ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତି ବିଗିଡ଼ିବା ବିରୋଧରେ ବିଜେପିର ବିକ୍ଷୋଭର ନେତୃତ୍ୱ ନେଉଥିବା ବେଳେ ଏହି ଘଟଣା ଘଟିଥିଲା। ଜିଲ୍ଲାପାଳଙ୍କ କାର୍ଯ୍ୟାଳୟ ଭିତରକୁ ବିକ୍ଷୋଭକାରୀଙ୍କୁ ପଶିବାରୁ ରୋକିବାକୁ ଚେଷ୍ଟା କରୁଥିବା ଧନୁପାଲି ଥାନା ଆଇଆଇସି ଅନିତା ପ୍ରଧାନ( ଏବେ ବଦଳି ହୋଇଯାଇଛି) ଙ୍କୁ ଗାଳିଗୁଲଜ କରିବା ସହ ଠେଲି ଦେଇଥିବା ଅଭିଯୋଗ ହୋଇଛି। ଶ୍ରୀ ମିଶ୍ରଙ୍କ ବିରୋଧରେ ଅନିତା ପ୍ରଧାନ ଅଭିଯୋଗ କରିଥିଲେ ଯେ ଜୟନାରାୟଣ ମିଶ୍ର ତାଙ୍କୁ ଅପମାନିତ କରିବା ସହ ତାଙ୍କ କର୍ତ୍ତବ୍ୟରେ ବାଧା ସୃଷ୍ଟି କରିଛନ୍ତି।

ତେବେ ଶ୍ରୀ ମିଶ୍ର ଏହି ଅଭିଯୋଗକୁ ଅସ୍ୱୀକାର କରିବା ସହ ଅନିତା ପ୍ରଧାନ ଲାଞ୍ଚ ନେଇ ତାଙ୍କୁ ଡକାୟତ କହି ଉତ୍ତେଜିତ କରିଥିଲେ ବୋଲି କହିଥିଲେ। ଅନିତା ପ୍ରଧାନ ଅନ୍ୟ ବିଜେପି କର୍ମୀଙ୍କୁ ମାଡ଼ ମାରିଥିବା ଅଭିଯୋଗ କରି ସେ ତାଙ୍କ ବିରୋଧରେ ପ୍ରତିବାଦ କରିଥିଲେ।

କୋର୍ଟଙ୍କ ଏହି ଆଦେଶ ସମ୍ବଲପୁରବିଧାୟକ ତଥା ଓଡ଼ିଶା ବିଧାନସଭାର ବିରୋଧୀ ଦଳ ନେତା ଜୟନାରାୟଣ ମିଶ୍ରଙ୍କ ପାଇଁ ବଡ଼ ଆଶ୍ୱସ୍ତି ଆଣିଛି। ସେ ରାଜ୍ୟର ଜଣେ ପ୍ରମୁଖ ବିଜେପି ନେତା ଏବଂ ବିଭିନ୍ନ ପ୍ରସଙ୍ଗରେ ଶାସକ ବିଜେଡି ସରକାରଙ୍କ ବିରୋଧରେ ସ୍ୱର ଉତ୍ତୋଳନ କରିଆସୁଛନ୍ତି।