ମରୁଡ଼ି ସଙ୍କଟରୁ ମୁକ୍ତି ପାଇଁ ବାବା ମହାକାଳଙ୍କୁ ଡାକିଲେ ମଧ୍ୟ ପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ
ମଧ୍ୟ ପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ ଉଜ୍ଜୈନର ବାବା ମହାକାଳଙ୍କୁ ଦର୍ଶନ କରିଛନ୍ତି। ରାଜ୍ୟରେ ଭଲ ବର୍ଷା ହେବାର କାମନା କରି ସିଏମ୍ ଚୌହାନ ବାବାଙ୍କ ଦରବାରରେ ପହଞ୍ଚିଥିଲେ ଏବଂ ଏଠାରେ ସେ ମହାରୁଦ୍ରାଭିଷେକରେ ସାମିଲ ହୋଇଥିଲେ। ଭାଦ୍ରବ ମାସର ପ୍ରଥମ ସୋମବାର ଉଜ୍ଜୈନସ୍ଥିତ ମହାକାଳେଶ୍ୱର ମନ୍ଦିର ଯାଇ ମୁଖ୍ୟମନ୍ତ୍ରୀ ଭଗବାନଙ୍କ ଆଶୀର୍ବାଦ ନେଇଥିଲେ।
ମହାକାଳ ମନ୍ଦିରରେ ମହାରୁଦ୍ରାଭିଷେକ ୬ ଘଣ୍ଟା ଧରି ଚାଲିଥିଲା। ପଣ୍ଡିତ ଆଶିଷ ପୂଜାରୀଙ୍କ ମୁତାବକ, ମହାରୁଦ୍ରାଭିଷେକ କରିବା ଦ୍ୱାରା ସମସ୍ତ ମନୋକାମନା ପୂର୍ଣ୍ଣ ହୋଇଥାଏ। ଯଦି ମହାରୁଦ୍ରାଭିଷେକ ଜନହିତ ପାଇଁ କରାଯାଏ, ତେବେ ନିଶ୍ଚିତ ରୂପେ ସଫଳ ହୋଇଥାଏ। ମହାରୁଦ୍ରାଭିଷେକ ଭଗବାନ ଶିବଙ୍କ ଆରାଧନାର ସବୁଠାରୁ ବଡ଼ ଅନୁଷ୍ଠାନ। ଦ୍ୱାଦଶ ଜ୍ୟୋତିର୍ଲିଙ୍ଗ ମଧ୍ୟରୁ ଅନ୍ୟତମ ମହାକାଳେଶ୍ୱରଙ୍କ ଦରବାରରେ ଯେତେବେଳେ ବି ମହାରୁଦ୍ରାଭିଷେକ କରାଯାଇଛି, ତାହା ସଫଳ ହୋଇଛି। ଏଥର ରାଜ୍ୟରେ ଭଲ ବର୍ଷା ପାଇଁ ମୁଖ୍ୟମନ୍ତ୍ରୀଙ୍କ ତରଫରୁ ମହାରୁଦ୍ରାଭିଷେକ କରାଯାଇଛି।