ଶେଷ ହୋଇଗଲାଣି ୟୁକ୍ରେନର ଅସ୍ତ୍ରଶସ୍ତ୍ର, ପାକିସ୍ତାନରୁ ଅସ୍ତ୍ରଶସ୍ତ୍ର କିଣିବାକୁ ଯୋଜନା

ଇସ୍ଲାମାବାଦ : ଏକ ଜରୁରୀକାଳୀନ ପାକିସ୍ତାନ ଗସ୍ତରେ ଆସୁଛନ୍ତି ୟୁକ୍ରେନର ବୈଦେଶିକ ମନ୍ତ୍ରୀ ଦିମିତ୍ରୀ କୁଲେବା । ଏହି ସମୟରେ ଅସ୍ତ୍ରଶସ୍ତ୍ର କ୍ରୟକୁ ନେଇ ଦୁଇଦେଶ ମଧ୍ୟରେ ବୁଝାମଣା ହୋଇପାରେ । ରୁଷ୍ ସହ ଯୁଦ୍ଧ ଲଢ଼ୁଥିବା ୟୁକ୍ରେନ୍ ସେନା ଆଜିକାଲି ଅସ୍ତ୍ରଶସ୍ତ୍ରର ଘୋର ଅଭାବ ସହ ସଂଘର୍ଷ କରୁଛି । ଏଣୁ ପାକିସ୍ତାନରୁ ଅସ୍ତ୍ରଶସ୍ତ୍ର କିଣିବା ପାଇଁ ଯୋଜନା କରୁଛି ୟୁକ୍ରେନ ।
ଏହା ପୂର୍ବରୁ ପାକିସ୍ତାନ ଅନ୍ୟ ଦେଶ ଦେଇ ୟୁକ୍ରେନକୁ ଅସ୍ତ୍ରଶସ୍ତ୍ର ବିକ୍ରି କରିସାରିଛି। ଏବେ ୟୁକ୍ରେନ ଆଶା କରୁଛି ଯେ ପାକିସ୍ତାନ ସେମାନଙ୍କୁ ସିଧାସଳଖ ଅସ୍ତ୍ରଶସ୍ତ୍ର ଦେଇ ସାହାଯ୍ୟ କରିପାରିବ। ପାକିସ୍ତାନ ଓ ୟୁକ୍ରେନ ମଧ୍ୟରେ ପୂର୍ବରୁ ଦୃଢ଼ ପ୍ରତିରକ୍ଷା ସମ୍ପର୍କ ରହିଛି । ୟୁକ୍ରେନରୁ ଟ୍ୟାଙ୍କ ସମେତ ଅନ୍ୟାନ୍ୟ ଅସ୍ତ୍ରଶସ୍ତ୍ର କିଣିଛି ପାକିସ୍ତାନ ।

ଇକୋନୋମିକ୍ ଟାଇମ୍ସର ଏକ ରିପୋର୍ଟ ଅନୁସାରେ କୁଲେବାଙ୍କ ଗସ୍ତ ଯୁଦ୍ଧ ମଧ୍ୟରେ ୟୁକ୍ରେନରୁ ପାକିସ୍ତାନକୁ ପ୍ରଥମ ବଡ଼ ଗସ୍ତ ହେବ । ଏହି ସମୟ ମଧ୍ୟରେ ପ୍ରତିରକ୍ଷା କ୍ରୟ ପ୍ରସଙ୍ଗ ମୁଖ୍ୟତଃ ଏଜେଣ୍ଡାରେ ସ୍ଥାନ ପାଇବ ବୋଲି ଆଶା କରାଯାଉଛି। ଏହି ଯାତ୍ରା ଚଳିତ ସପ୍ତାହ କିମ୍ବା ଆସନ୍ତା ସପ୍ତାହରେ ହୋଇପାରେ । କୁଲେବାଙ୍କ ପାକିସ୍ତାନ ଗସ୍ତ ଉପରେ ଉଭୟ ଭାରତ ଓ ରୁଷ୍ ନଜର ରଖିଛନ୍ତି। ରିପୋର୍ଟ ଅନୁଯାୟୀ, ୟୁକ୍ରେନର ବୈଦେଶିକ ମନ୍ତ୍ରୀ ଦିମିତ୍ରୀ କୁଲେବା ତାଙ୍କ ଗସ୍ତ ସମୟରେ ତାଙ୍କ ପାକିସ୍ତାନୀ ପ୍ରତିପକ୍ଷ ବିଲାୱଲ ଭୁଟ୍ଟୋ ଜରଦାରୀଙ୍କୁ ଭେଟିବେ। ସେ ପ୍ରଧାନମନ୍ତ୍ରୀ ଶେହବାଜ ସରିଫ୍ ଏବଂ ସାମରିକ ଅଧିକାରୀମାନଙ୍କୁ ମଧ୍ୟ ଭେଟିବାର ସମ୍ଭାବନା ରହିଛି।