ଶିମଲାରେ ନୁହେଁ ବେଙ୍ଗାଲୁରୁରେ ହେବ ବିରୋଧୀ ଦଳଙ୍କ ବୈଠକ: ଶରଦ ପାୱାର
ନୂଆଦିଲ୍ଲୀ: ୨୦୨୪ ଲୋକସଭା ନିର୍ବାଚନକୁ ଦୃଷ୍ଟିରେ ରଖି ବିଜେପି ବିରୋଧରେ ଲଢେଇ ପାଇଁ ଏବେ କିଛି ବିରୋଧୀ ଦଳ ଏକାଠି ହୋଇଛନ୍ତି | ତେବେ ବିଜେପି ବିରୋଧରେ ଏକଜୁଟ ହେବାକୁ ଚେଷ୍ଟା କରୁଥିବା ବିରୋଧୀ ଦଳର ପରବର୍ତ୍ତୀ ବୈଠକ ବେଙ୍ଗାଲୁରୁରେ ଅନୁଷ୍ଠିତ ହେବ। ପୂର୍ବରୁ ଏହି ବୈଠକ ଶିମଲାରେ ହେବ ବୋଲି କୁହାଯାଉଥିଲା। ତେବେ ଆଜି ଏନସିପି ସୁପ୍ରିମୋ ଶରଦ ପାୱାର କହିଛନ୍ତି ଯେ ବିରୋଧୀ ଦଳର ପରବର୍ତ୍ତୀ ବୈଠକ ଜୁଲାଇ ୧୩ ଏବଂ ୧୪ ରେ ବେଙ୍ଗାଲୁରୁରେ ଅନୁଷ୍ଠିତ ହେବ। ଶରଦ ପାୱାର ମଧ୍ୟ ପ୍ରଧାନମନ୍ତ୍ରୀ ମୋଦୀଙ୍କ ଅଭିଯୋଗର ଜବାବ ଦେଇଛନ୍ତି | ପାୱାର କହିଛନ୍ତି ଯେ ପାଟନାରେ ବିରୋଧୀ ଦଳର ବୈଠକ ପରେ ପ୍ରଧାନମନ୍ତ୍ରୀ ମୋଦୀ ଅଶାନ୍ତ ହୋଇପଡିଛନ୍ତି।
ଯେଉଁଠାରେ ବିଜେପି ସରକାର ଅଛି ସେଠାରେ ଦଙ୍ଗା ହେଉଛି। ଜାତି ଧର୍ମ ନାମରେ ମହାରାଷ୍ଟ୍ରରେ ଦଙ୍ଗା ଚାଲିଛି। ବାସ୍ତବରେ ମଙ୍ଗଳବାର ଦିନ ବିରୋଧୀ ଦଳକୁ ଟାର୍ଗେଟ କରି ପ୍ରଧାନମନ୍ତ୍ରୀ ମୋଦୀ କହିଥିଲେ ଯେ ଗତ ଦୁଇଟି ନିର୍ବାଚନରେ ବିରୋଧୀ ଦଳମାନେ ଯେତିକି ଚିନ୍ତିତ ନଥିଲେ ଏବେ ତାହାଠାରୁ ଅଧିକ ଚିନ୍ତାରେ ପଡିଯାଇଛନ୍ତି | ସେମାନଙ୍କର ଅସ୍ଥିରତା ଦର୍ଶାଉଛି ଯେ ୨୦୨୪ ନିର୍ବାଚନରେ ବିଜେପିକୁ ଫେରାଇ ଆଣିବାକୁ ଦେଶର ଲୋକମାନେ ନିଷ୍ପତ୍ତି ନେଇଛନ୍ତି। ୨୦୨୪ରେ ପୁଣି ଥରେ ବିଜେପିର ବିଜୟ ନିଶ୍ଚିତ ହୋଇଛି, ସେଥିପାଇଁ ବିରୋଧୀ ଦଳ ଚିନ୍ତିତ ଅଛନ୍ତି। ଉଲ୍ଲେଖ ଥାଉ କି ଜୁନ ୨୩ରେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଏବଂ ଉପମୁଖ୍ୟମନ୍ତ୍ରୀ ତେଜସ୍ୱୀ ଯାଦବଙ୍କ ଦ୍ୱାରା ଆୟୋଜିତ ବୈଠକରେ ୩୦ରୁ ଅଧିକ ବିରୋଧୀଦଳ ସାମିଲ ହୋଇଥିଲେ। ଏହି ବୈଠକରେ ଆଗାମୀ ଲୋକସଭା ନିର୍ବାଚନ -୨୦୨୪ରେ ବିଜେପି ବିରୋଧରେ ଏକଜୁଟ ହେବା ପାଇଁ ରଣନୀତି ଉପରେ ଆଲୋଚନା କରାଯାଇଥିଲା। ତେବେ ପରବର୍ତ୍ତୀ ବୈଠକ ଶିମଲାରେ ହେବ ବୋଲି କୁହାଯାଇଥିଲା | ତେବେ ଆଜି ଶରଦ ଏହା ବେଙ୍ଗାଲୁରୁରେ ହେବ ବୋଲି ସ୍ପଷ୍ଟ କରିଛନ୍ତି |