ଓଡ଼ିଶା ଟ୍ରେନ୍ ଦୁର୍ଘଟଣାର ପୀଡ଼ିତ ପରିବାରଙ୍କୁ ସାହାଯ୍ୟ ପାଇଁ ଆଗେଇ ଆସିଲେ ସୋନୁ ସୁଦ
ଓଡ଼ିଶାର ବାଲେଶ୍ୱର ଜିଲ୍ଲାରେ ହୋଇଥିବା ଭୟଙ୍କର ଟ୍ରେନ୍ ଦୁର୍ଘଟଣାରେ ପୀଡ଼ିତ ପରିବାରଙ୍କୁ ସାହାଯ୍ୟ ପାଇଁ ଆଗେଇ ଆସିଛନ୍ତି ବଲିଉଡ୍ ଅଭିନେତା ସୋନୁ ସୁଦ। ସେ ଟ୍ୱିଟ୍ କରି ଲୋକଙ୍କୁ ସାହାଯ୍ୟ କରିବା କଥା କହିଛନ୍ତି। ଜୁନ୍ ୩ରେ ସୋନୁ ଟ୍ରେନ୍ ଦୁର୍ଘଟଣାରେ ନିଜ ପ୍ରିୟଜନଙ୍କୁ ହରାଇଥିବା ପରିବାର ପ୍ରତି ସମବେଦନା ଜଣାଇ ଏକ ହୃଦୟସ୍ପର୍ଶୀ ବାର୍ତ୍ତା ସେୟାର କରିଥିଲେ।
ବର୍ତ୍ତମାନ ପୀଡ଼ିତ ପରିବାର ନିକଟରେ ସାହାଯ୍ୟ ପହଞ୍ଚାଇବା ସମ୍ପର୍କରେ ସୋନୁ ସୁଦ ଟ୍ଵିଟ୍ କରି କହିଛନ୍ତି, ‘ଓଡ଼ିଶା ଟ୍ରେନ୍ ଟ୍ରାଜେଡ଼ିରେ ନିଜ ପରିବାର ଲୋକଙ୍କୁ ହରାଇଥିବା ପୀଡ଼ିତଙ୍କ ଜୀବନକୁ ପୁନଃନିର୍ମାଣ କରିବାରେ ଆମେ ତାଙ୍କୁ ସାହାଯ୍ୟ କରୁଛୁ’। ସେ ଅଧିକରୁ ଅଧିକ ସାହାଯ୍ୟକାରୀଙ୍କ ନିକଟରେ ପହଞ୍ଚିବା ପାଇଁ ନିଜର ଚାରିଟି ଫାଉଣ୍ଡେସନର ନମ୍ବର ମଧ୍ୟ ସେୟାର କରିଛନ୍ତି।
ଭିଡିଓରେ ସୋନୁ କହୁଛନ୍ତି, ‘ଟ୍ରେନ୍ ଦୁର୍ଘଟଣାର ପୀଡ଼ିତଙ୍କୁ ସାହାଯ୍ୟ କରିବା ପାଇଁ ଆମେ ଏକ ହେଲ୍ପଲାଇନ ନମ୍ବର 9967567520 ଜାରି କରିଛୁ, ଯାହା ମୁଁ ଆପଣଙ୍କ ସହିତ ସେୟାର କରୁଛି। ଏହି ନମ୍ବରରେ ଆପଣ ପୀଡିତଙ୍କ ପରିବାର ସହିତ ଆମକୁ ସଂଯୋଗ କରିପାରିବେ। ତେଣୁ ଦୟାକରି ଏହି ନମ୍ବରରେ ମେସେଜ ପଠାନ୍ତୁ’।
ସୋନୁ ଆହୁରି କହୁଛନ୍ତି ଯେ ‘ମନେରଖନ୍ତୁ, ଏହି ନମ୍ବରରେ ଆପଣଙ୍କୁ କଲ୍ କରିବାକୁ ପଡିବ ନାହିଁ, କେବଳ SMS ପଠାଇବାର ଅଛି। ଆପଣ ସେହି ପରିବାର ସହିତ ଆମକୁ ଯୋଡ଼ନ୍ତୁ, ସେମାନଙ୍କୁ ପୁଣିଥରେ କିପରି ଗୋଡ଼ରେ ଛିଡ଼ା କରାଯିବ, ତାହା ଆମେ ଚେଷ୍ଟା କରିବୁ। ପୀଡ଼ିତ ପରିବାରର ଚାକିରି, ବ୍ୟବସାୟ, ପିଲାମାନଙ୍କ ପାଠପଢ଼ାକୁ ନେଇ ସବୁ ପ୍ରକାର ସାହାଯ୍ୟ କରିବାକୁ ଆମେ ସମ୍ପୂର୍ଣ୍ଣ ଚେଷ୍ଟା କରିବୁ’।
କହି ରଖୁଛୁ, ଏହାପୂର୍ବରୁ ସୋନୁ ସୁଦ ଏକ ଟ୍ଵିଟ୍ରେ ଓଡ଼ିଶା ଟ୍ରେନ ଦୁର୍ଘଟଣାକୁ ନେଇ ଏକ ଭାବପୂର୍ଣ୍ଣ ଭିଡିଓ ସେୟାର କରିଥିଲେ।