ରାହୁଲଙ୍କ ପାସପୋର୍ଟ ଜବତ କରନ୍ତୁ ସରକାର: ବିଜେପିର ଦାବି ନେଇ ଉତ୍ତର ଦେଲା କଂଗ୍ରେସ

ନୂଆଦିଲ୍ଲୀ: ଆମେରିକାରେ କଂଗ୍ରେସ ନେତା ରାହୁଲ ଗାନ୍ଧୀ ଦେଇଥିବା ବିବୃତିକୁ ନେଇ ବିବାଦ ଜାରି ରହିଛି। ବର୍ତ୍ତମାନ ରାଜସ୍ଥାନର ଚିତ୍ତୋରଗଡର ବିଜେପି ସାଂସଦ ସିପି ଯୋଶୀ ରାହୁଲ ଗାନ୍ଧୀଙ୍କ ପାସପୋର୍ଟ ଜବତ କରିବାକୁ ଦାବି କରି ଲୋକସଭା ବାଚସ୍ପତି ଓମ ବିର୍ଲାଙ୍କୁ ଚିଠି ଲେଖିଛନ୍ତି।

ସିପି ଯୋଶୀ ତାଙ୍କ ଚିଠିରେ କହିଛନ୍ତି, ରାହୁଲ ଗାନ୍ଧୀଙ୍କ ଭାଷଣ ଯୋଗୁ ଦେଶର ସାଧାରଣ ନାଗରିକ ଯନ୍ତ୍ରଣା ଭୋଗୁଛନ୍ତି। ରାହୁଲ ଗାନ୍ଧୀଙ୍କୁ ଦେଶ ବାହାରକୁ ଯାଇ ଦେଶକୁ ଅପମାନିତ କରିବାର ଅଧିକାର କିଏ ଦେଇଛି? ମୁଁ ଲୋକସଭା ବାଚସ୍ପତିଙ୍କୁ ଏକ ଚିଠି ଲେଖିଛି। ତାଙ୍କ ପାସପୋର୍ଟ ଜବତ କରାଯାଉ।

କଂଗ୍ରେସ ମଧ୍ୟ ଏହାର ପାଲଟା ଜବାବ ଦେଇଛି। କଂଗ୍ରେସ ସାଂସଦ ମଣିକମ ଟାଗୋର କହିଛନ୍ତି, ବିଜେପି ନେତାମାନେ ମଜା କରୁଛନ୍ତି। ରାହୁଲ ଗାନ୍ଧୀଙ୍କ ପାସପୋର୍ଟ ରଦ୍ଦ କରିବାକୁ ବିଜେପି ସାଂସଦ ବାଚସ୍ପତିଙ୍କୁ ଲେଖିଛନ୍ତି। ଲୋକସଭା ବାଚସ୍ପତିଙ୍କ କ’ଣ ପାସପୋର୍ଟ ଅଧିକାରୀ କି? ପାସପୋର୍ଟ କିଏ ରଦ୍ଦ କରନ୍ତି ତାହା ବିଜେପି ସାଂସଦ କ’ଣ ଜାଣି ନାହାନ୍ତି। ତାଙ୍କର ଏ ବିଷୟରେ ଜ୍ଞାନ କମ୍ ରହିଛି। ଓମ୍ ବିର୍ଲା ପାସପୋର୍ଟ ଦିଅନ୍ତି ନାହିଁ ।

ସୂଚନାଯୋଗ୍ୟ, ନିକଟରେ ଆମେରିକା ଗସ୍ତରେ ଯାଇଥିବା ରାହୁଲ ଗାନ୍ଧୀ ଭର୍ଜିନିଆରେ ଭାଷଣ ଦେଇଥିଲେ। ଏହା ସହିତ ସେ ଭାରତୀୟ ଆମେରିକୀୟ ସମ୍ପ୍ରଦାୟର ବହୁ ଲୋକଙ୍କ ସହ କଥାବାର୍ତ୍ତା କରିଥିଲେ।

ସେ କହିଥିଲେ ଆରଏସ୍‌ଏସ୍ କେତେକ ଧର୍ମ, ଭାଷା ଏବଂ ସମ୍ପ୍ରଦାୟକୁ ଅନ୍ୟମାନଙ୍କ ତୁଳନାରେ କମ୍ ବୋଲି ବିବେଚନା କରେ। ସେ କହିଥିଲେ ଭାରତରେ ରାଜନୀତି ପାଇଁ ସଂଗ୍ରାମ କରାଯାଉନାହିଁ, ବରଂ ଏସବୁ ପାଇଁ ଲଢ଼ାଯାଉଛି। ସେ ଏହା ମଧ୍ୟ କହିଥିଲେ ଯେ ସର୍ବପ୍ରଥମେ ଆପଣଙ୍କୁ ବୁଝିବାକୁ ପଡିବ ଯେ ଲଢ଼େଇର କାରଣ କ’ଣ?
ଲୋକସଭାରେ ବିରୋଧୀ ଦଳର ନେତା ରାହୁଲ ଗାନ୍ଧୀ ପ୍ରଶ୍ନ କରିଥିଲେ ଯେ ଭାରତରେ ଶିଖଙ୍କର ପଗଡ଼ି କିମ୍ବା କଡା ପିନ୍ଧିବାର ଅଧିକାର ଅଛି କି ନାହିଁ ଏବଂ ଜଣେ ଶିଖ ଗୁରୁଦ୍ୱାର ପରିଦର୍ଶନ କରିପାରିବେ କି ନାହିଁ ? ଖାଲିସ୍ତାନୀ ଆତଙ୍କବାଦୀ ଗୁରୁପତୱନ୍ତ ସିଂ ପନ୍ନୁ ରାହୁଲ ଗାନ୍ଧୀଙ୍କ ଏହି ବିବୃତିକୁ ସମର୍ଥନ କରି ଏହାକୁ ଯଥାର୍ଥ କହିଥିଲେ। ରାହୁଲ ଗାନ୍ଧୀ ଏକ ନିର୍ଭୀକ ବିବୃତି ଦେଇଛନ୍ତି ବୋଲି ସେ କହିଥିଲେ।